Skýrsla um uppbyggingu og skipulag endurhæfingarþjónustu – samanburður milli landa
Hér er birt skýrslan Skipulag og fjármögnun endurhæfingarþjónustu.
Markmið skýrslunnar er að hafa tiltækar upplýsingar um skipulag og fjármögnun endurhæfingarþjónustu í þeim vestrænu velferðarríkjum sem við helst berum okkur saman við og að hún nýtist þannig við stefnumótun í málaflokknum, einkum hvað varðar fjármögnun endurhæfingarþjónustu og uppbyggingu húsnæðis þeirra sem þjónustunni sinna.
Í skýrslunni kemur m.a. fram:
- Sérhæfð endurhæfingarþjónusta er samfélagslegt verkefni sem kostað er af hinu opinbera að stærstum hluta í þeim löndum sem við berum okkur saman við.
- Í samanburðarlöndum okkar er sérhæfðri endurhæfingarþjónustu yfirleitt sinnt af einkaaðilum og þá óhagnaðardrifnum, en greidd af hinu opinbera, yfirleitt í gegnum þjónustusamning. Sums staðar er slíkri þjónustu sinnt af hinu opinbera beint að einhverju leyti, en slíkt tengist yfirleitt mjög sérhæfðri þjónustu eða landfræðilegum ástæðum.
- Hið opinbera greiðir iðulega húsnæðiskostnað í löndunum sem við berum okkur saman við og þá yfirleitt í gegnum þjónustusamninga. Algengasta greiðslu-fyrirkomulag er gegnum daggjald sem innifelur allan kostnað. Misjafnt er milli landa og eftir eðli starfsemi hvað kostnaður tengdur húsnæði vegur þungt í slíkum samningum. Fer það m.a. eftir því hvort húsnæðið er lagt fram af hinu opinbera eða ekki, þ.e. hvort stofnkostnaður er innifalinn eða ekki.
- Hið opinbera hefur í flestum þessum löndum ríka aðkomu að uppbyggingu húsnæðis fyrir sérhæfða endurhæfingarþjónustu. Útfærslan er mismunandi milli landa og tegund þjónustu en getur verið á formi stofnfjárfestinga, hagstæðra lána, árlegra greiðslna sem hluta af þjónustusamningi eða í sér samningum, eða að hið opinbera sér um uppbygginguna og leigir rekstraraðilum húsnæðið. Sammerkt er þó að hið opinbera ber allan kostnað af húsnæðinu hvort sem það er gegnum daggjöldin eða með öðrum hætti.
Höfundur skýrslunnar er Karl Sigurðsson, greinandi hjá SFV.